Fel arfer, mae Bore Coffi blynyddol Macmillan yn gweld miliynau o bunnoedd yn cael eu rhoi i helpu i gefnogi pobl sy'n cael eu heffeithio gan ganser. Mae'r arian sy’n cael ei godi yn helpu i ariannu gwasanaethau Macmillan i sicrhau bod pobl â chanser yn gallu cael y cymorth corfforol, emosiynol ac ariannol sydd ei angen arnynt. Fel cynifer o elusennau, mae Macmillan wedi gweld gostyngiad enfawr yn ei incwm codi arian o ganlyniad uniongyrchol i effaith barhaus Covid-19. Mae Bore Coffi blaenllaw'r elusen – sy'n un o ddigwyddiadau codi arian hiraf y DU – yn wynebu gostyngiad syfrdanol o 71% mewn incwm am yr ail flwyddyn yn olynol (£20m).
Wrth siarad am eu cefnogaeth i'r digwyddiad codi arian blynyddol, dywedodd Dr Altaf Hussain AS: "Mae Macmillan, ochr yn ochr â'n GIG a phartneriaid eraill, yn gweithio'n ddiflino i wneud beth bynnag mae'n ei gymryd i bobl â chanser. Maen nhw’n gwneud hynny ar adeg pan fo'r amhariad a achoswyd gan Covid-19 yn golygu bod y galw am wasanaethau'r elusen yn uchel, tra bod ei hincwm wedi gostwng.
"Rwy'n falch iawn o helpu i gefnogi bore coffi Macmillan, ac i helpu i roi gwybod i bobl bod y digwyddiad codi arian pwysig hwn yn dal i fynd rhagddo. Byddwn yn annog unrhyw un i gymryd rhan, ac i drefnu neu gyfrannu at fore coffi lleol yn y ffordd sy'n gweddu orau iddyn nhw."
Dywedodd Richard Pugh, Pennaeth Gwasanaethau Cymorth Canser Macmillan yng Nghymru: "Hoffem gynnig diolch o galon i Altaf am eu cefnogaeth.
"Daw dros 98% o gyllid Macmillan yn uniongyrchol o roddion, a gallai miloedd o bobl golli allan ar ofal hanfodol gan ein nyrsys enwog heb gefnogaeth barhaus y cyhoedd i'n digwyddiad codi arian Bore Coffi.
“Nid gor-ddweud yw dweud nad yw Macmillan a phobl â chanser erioed wedi bod angen cymorth y cyhoedd yn fwy nag ar hyn o bryd. Nid oes un ffordd neu ffordd gywir o gynnal bore coffi – gall fod beth bynnag yr hoffech chi, a gellir ei gynnal pan fydd yn addas i chi. Rydym yn gobeithio'n fawr y bydd pobl yn gwneud popeth o fewn eu gallu i wneud hynny."
Mae Bore Coffi Macmillan eleni yn disgyn ar 24 Medi ond gellir cynnal digwyddiadau lleol drwy gydol y flwyddyn. Sut bynnag y byddwch chi’n dewis cynnal eich Bore Coffi Macmillan, gallwch ymweld â https://coffee.macmillan.org.uk am syniadau cynnal, gemau ac ysbrydoliaeth pobi. Am wybodaeth neu gymorth sy'n ymwneud â chanser, ffoniwch Linell Gymorth Macmillan ar 0808 808 00 00 (8am i 8pm o ddydd Llun i ddydd Gwener) neu ewch i www.macmillan.org.uk.