MAE ail-agor gwasanaethau swyddfa’r post yn Abercynffig ar ôl bwlch o bedair blynedd wedi’i groesawu gan yr MS Rhanbarthol Altaf Hussain, Dr Hussain o'r Ceidwadwyr Cymreig oedd y person cyntaf i ymweld â'r cownter newydd yn Llyfrgell Abercynffig fore Llun. Mae'r gwasanaeth yn cael ei ddarparu gan bostfeistr Brynmenyn Peter Kwok Wong a'i wraig Rachel. Dywedodd Altaf: “Mae’n newyddion gwych gweld gwasanaeth swyddfa bost yn Abercynffig eto. Bu’n golled fawr pan gollwyd y swyddfa bost a oedd wedi’i lleoli yn un o siopau’r pentref. Cyn hynny, roedd gan y pentref ei swyddfa bost annibynnol ei hun ers degawdau. “Rwy’n byw ym Mhen-y-fai ac rydym hefyd wedi colli ein swyddfa bost yno. Felly byddwn yn annog trigolion y ddwy gymuned i gefnogi’r gwasanaeth newydd hwn os gallant. Bydd Swyddfa’r Post yn cadw golwg ar nifer yr ymwelwyr felly os ydym am ehangu’r oriau agor mae’n rhaid i ni ddangos bod ei angen a’i fod yn cael ei ddefnyddio’n helaeth.” Mae Swyddfa'r Post ar gael ar ddydd Llun rhwng 11am ac 1pm ond caiff hyn ei adolygu wrth i amser fynd rhagddo. Dywedodd Dean Tuck, sy’n oruchwyliwr Llyfrgell Abercynffig, y byddai cael y swyddfa bost yno ar ddydd Llun yn denu pobl i’r llyfrgell nad oedd efallai’n ymweld â’r adeilad fel arfer. Meddai: “Mae’r llyfrgell wrth galon y gymuned felly mae’n braf ein bod yn gallu darparu cartref i’r swyddfa bost ar hyn o bryd.” Mae Mr Wong, sydd wedi bod yn rhedeg Swyddfa Bost Brynmenyn ers saith mlynedd, hefyd yn darparu gwasanaeth yn Coytrahen i bentrefwyr. Dywedodd fod pobl mewn cymunedau lleol yn gyfeillgar iawn a'i fod yn falch o allu gwasanaethu trigolion Abercynffig yn enwedig gan fod rhai wedi bod yn dod i'r swyddfa ym Mrynmenyn ac felly'n adnabyddus iddo ef a'i wraig.
